Kurdîzan Zazakî - 1 - Kitabê Derse - Kitabê Xebate

VER VATE Û DAŞINASNAYENE

Kurdîzan sey setê banderkerdişê kurdî hîrê duştan ra pê yeno: Duştê Destpêkî, Duşto Mîyanîne û Duşto Berze. Her duşt di kitaban ra pê yena: Kitabê Ders û Kitabê Xebate. Kitabê Dersî banderkerdişê temayanê tewirbitewiran û mewzûyanê gramerî ser o vindenê, labelê Kitabê Xebate tena temrînanê nê temayan ûmewzûyanê gramerî ser o vindenê.

No kitabo ke şima dest de yo, kitabê ewilî yê nê setî yo. Kurdîzan, warê banderkerdişê kurdkî de seba tayê îhtîyacan ameyo amadekerdene. Qandê sîstematik û asankerdişê banderîye pergalê unîte û dersan ameyo xebitnayene. Her duşt du hebî unîteyan ra û her unîte zî 14 hebî dersan ra pê yeno. Yanî her duştî de 28 hebî dersî estê.

Kurdîzan seba perwerdeyê mekteban, bernameyê lîsansî, lîsansê berzî, kursanê taybetîyan û xebatanê şexsîyan ameyo plankerdene û çarçoveyê nê prensîbanê cêrênan ameyo amadekerdene:

• Nê kitabî de prensîbê “asanîye ra ver bi zorîye” û “sadeyîye ra ver bi alozîye” ameyo xebitnayene.

• Kurdîzan sey kitabê banderkerdişê ziwanî bi hawayêko hemsenc, averberdişê çar huneranê bingehînan yê ziwanî xo rê keno amanc ke nê zî eşnawitiş, qalîkerdiş, wendiş û nuştiş o.

• Kitabî de metodê spirale ameya xebitnayene. Mewzûyê ewilî mîyanê mewzûyanê peyênan de ameyê dubarekerdene. Bi rayîrê dubarekerdişî, mewzûyê verênî ameyê vîrardene û hîna xurt bîyê.

• Her dersêke bi metin û dîyalogêkî dest pêkena, badê cû mewzûyêka gramerî ca gêna û dima zî temrînî yenê